Pour ce que plus proprement
Chascuns de son sentement
Parle que d’autrui pensee,
Je, de ce que mon cuer sent,
Voeil faire amoureusement
Un lay, Amours, si vous agree.
Et se ce fai rudement,
De vous gracieusement
M’en soit l’euvre pardonnee,
Ma dame, si vraiement
Que mes cuers est ligement
Tous vostres sanz demouree.
Je fui, ma dame de pris,
Sanz mespris,
En qui tout bien est compris
Par vo tres douce maniere
De vous bien amer espris
Et souspris,
Si que encore sui tout pris
Quant je voy vo lie chiere.
Si ne doi estre repris
Se j’empris
A vous amer, que je pris,
Quar Amours fine et entiere
Le m’a enjoint et apris;
S’est mes pris,
Que ne m’aiés en despris,
Ma tres doulce dame chere.
Et quant je me senti a ce mené,
Par le pooir d’Amours, qui tous cuers vaint,
Que mi penser furent tout ordené
En vous, ma dame, en qui tous mes corps maint.
Je, confians de vostre humilité,
D’ardant desir fort espris et contraint
A vous servir de bonne volenté
M’offri, dame, moult de paour attaint.
Et vous, ma dame honnoree,
De franchise enluminee,
De humilité renommee,
Et de toute honnour paree,
Disant grant mercis
De maniere asseüree,
Par semblant enamouree,
Si fistes estre doublee
L’ardour et renouvelee,
Ou j’estoie mis,
Dont ma coulour fu muee,
Et ma vigour tresalee,
Comme se chose facee
M’eüst troublé a journee
Tous mes esperis.
Helas! doulce desiree,
Gaires n’estes aprestee,
Attainte ne apprisee,
De la peine a moy donnee
Pour vostre doulz vis.
Ainsi departant,
Ma dame vaillant,
Fui de vous; maiz tant
Me senti engrant
Devers vous retraire,
Que tous jours present
Estoie et tendant
A vo doulz semblant,
Et gent corps plaisant,
Pour y retour faire.
Si me mis avant
Par maintes fois, quant
Vers vous esbatant,
Juant et bourdant,
On se pouoit traire,
La doulçour si grant
Estoie sentant
En vous regardant,
Que mieux n’en vivant
Ne me peüst plaire.
Et ce m’a tenu en joie
Si grande que ne vouloie
Greigneur bien, ne ne queroie
Que la douçour ou j’estoie
En trestout me delitoie
Et sanz grevance faisoie
Tout ce que de cuer pensoie
Comment n’y failloie.
Quant aucune part aloie,
Si tres legiers me sentoie
Que a mon avis je voloie;
Et ainsi mon temps passoie,
Ne nul courroux ne tenoie,
Puis que a penser m’atournoie
A vous doulce, simple et coie,
A cui tous mes cuers s’ottroie.
Helas! celle douce vie,
Renvoisie
Et jolie,
M’a pou tenu compaignie,
Dont je me dueil fort.
Par malvaise genglerie,
Par envie
Commencie.
Diex Malebouche maldie
Et dont elle a port,
Quar la perverse pourrie,
Ennemie
Renoiie
Defait contre moy partie
Et me greve a tort
Tant que jour, nuit ne demie
N’est partie,
Ne faillie
Ma doulour, ne amenrie
Dont j’ay pis que mort.
Quar ce que j’ay plus doubté que mourir
M’est avenu; bien doy l’eure haïr.
C’est qu’il me faut, et par force, abstenir
D’aler parler et aussi d’envoier
Vers ma dame que j’aim, craing, et desir
Plus que chose que Dieux ait fait venir.
Helas! comment pourraie je ce souffrir?
Je ne le sçay, se Dieux me vueille aider.
Si n’en peüst qu’a moy seul mesvenir,
Je fusse tous conseillés de choisir,
Maiz ma dame en pourroit grant mal sentir
Et sanz raison son oïr reprochier,
Et ce mes cuers ne pourroit consentir.
Ainsi me doint Amours de li joïr
Que oncques vers lui n’oi cuer, fait, ne desir,
Ne pensee pour s’onnour empirier.
Et elle est, a dire voir,
Pleinne de si grant savoir,
Et si bien veult son devoir
Faire leur elle est tenue
Que on ne lui pourroit mouvoir
A mal, ne li decevoir,
Tant est pour tout parcevoir
Sage, et de bien pourveüe.
Chascun scet bel recevoir
Dont sa bonté apparoir
Se fait et ramentevoir
Tant que bien est congneüe,
Dont je me doy bien doloir
Et avoir cuer triste et noir,
Quant de si plaisant miroer
M’est couverte la veüe.
Je ne sçay
Que verray
Ou iray,
Ne que devenray,
Maiz, comment qu’il aille
Et ameray,
Serviray,
Cremiray,
Et obeiray
Ma dame sanz faille.
Pour esmay,
Se je l’ay,
Et maltray,
Je ne laisseray
Bon grain pour la paille,
Ains aray
Cuer tres vray,
Et feray
Ce que deveray,
Et vaille que vaille.
Ma tres doulce dame excellente,
Pour ce que vo loyaux cuer sente
Et sache le bien et dolour
Que bonne Amours en mon cuer ente
Pour vous que on doit dire vraie ente
De tout bien et de toute honnour.
En ce lay faire ay je mis mente
Et compris, sans ce que je mente
Ma vie, attains de vostre amour,
Si veulliés, s’on le vous presente,
A l’oïr lire estre presente,
Et ne le tenés a labour.
Amis, tieng certainnement
Qu’il me desplaist grandement
De la peinne a toy livree,
Maiz il faut souffrir souvent
La choze qui bonnement
Tost ne puet estre amendee.
Vif en espoir liement,
Et serf Amours loialment,
Quar toudis n’ara duree
Chis temps, et aucunnement
Verras que pour toy briefment
Sera joie recouvree.
Guillaume de Machaut (c1300-1377)
Machaut: Sovereign Beauty
